UM PELOMPIT

Nena`an kinê ni bobot esa si ma`ento aki walê ni mapenguma. Endo mekasa si bobot ya`ai mapato-pato witu ronga ung kendir wo êleken-na mo si mapenguma ya`ai wo si ka`awuna tasibu mawuka u gardus esa. Si bobot ya`ai kariamo u maka`apa-ka`apa wia un atê dai` mento` mengêlengêlek sê dua sena`awu ti`I mawuka u gardus. Kuano ni bobot ya`ai witu un atêna “ Tantu mo kouman kekanen lê`os wo emut um pawuka`an nêra na`ai". Mekewuka angê u gardus ti`i sêra, si bobot ya`ai naimo ikedang-dang nu tangkompo`, êlekena lako nepa u nai ondol witu gardus ti`i, ni`itu ndê`ên um pelompit esa u weru tineles ni mapenguma ya`ai.
Kariamo un indê`na, si bobot ya`ai mangêmo aki kelasan umbalê wo mangêrê-ngêrêt, kuanamo " Orêkêy aku ya`ai, aien pê aku, peteta`anan nêramo um pelompit aku!".

Kasuatan na mangêrêngêrêt, sia wo mangê rêndêên lako ni ko`oko` esa. Kuano ni ko`oko` ya`ai wia nisia "Ê kiok niko bobot, sa tanumo ni`iya dai`mo urê ko idewengo, êina` lê`osokan um pelompit ti`i dai` ma`êndo ko`oko` nu ni`itu ipata`an uman wia sê bobot".

Dimbus lako si ko`oko`, si bobot ya`ai mangê wia si wawi wo kuanamo wia si wawi ti`i " Orêkêy aku ya`ai, tulungen pê aku wawi, kenu peteta`anan nêramo um pelompit aku!". Wo wingkot ni wawi ya`ai wia nisia, kuanamo "Êina` kaloku bobot, kaêndoku mo genang ko ta`an niaku dai` mekekura. Sa nena`an nê toro tumulung niko itudu` ku mokan nisêra".

Dai` urê ni`itu si bobot ya`ai mangê kasi`na wia si sapi wo kuana mo wia si sapi " Orêkêy aku ya`ai, tulungen pê aku sapi, kenu peteta`anan nêramo um pelompit aku!". Ta`an si sapi ya`ai winê`êtengan-na uman tarê si bobot ya`ai wo kuanamo "Yo ta`an nyana udit ikaêndo ku genang. Sa taintu yo ung kamang mu mo nyana.!". Kateterang ni bobot ni`itu yo nisia naimo kan ikatuku` angê wo kuanamo witu un atê-na "Ê kiok niaku ya`ai, dai` siapa ndê`ên si kaêndo genang wia niaku. Yo sa taintu, waya`an no u mamoali wia niaku".

Witu um padua wengi, tadingano lako un tambak um pelompit minapisot wo u rikaskas aki walê ni tou mapenguma ti`i. Dai` kan urê ni`itu si ka`awu ni mapenguma ya`ai marewe-rewek magnê mêndo um pelompit ti`i ta`an mekerendem sia nu dai` winêan na genang sa si inêndo um pelompit ti`i dai` ndê`ên si bobot ta`an si sawa didem si inêndo witu un ipusna. Si ka`awu ni mapenguma ti`i kinikimo ni sawa didem ti`i wo sia mesaki.

Nu si ka`awuna minasakimo wo so`o kuman kuano ni mapenguma ya`ai "wa`wa` pê ka`apa sia isiwoku ko`ko ginorêng" wo tu`una sia mêndo si ko`oko` wo sia goreêngen-na. Ta`an si ka`awuna dai` kampê minalê`os. Dai` urê ni`itu maimo sê katuari ni ka`awuna ya`ai mai dumukad nisia nu sia tawimo matê. Nu daked sê sakêi aki walê ni mapenguma ya`ai, kuanamo wia nisêra " Êndono ai tarê si wawi kantong aki logos ti`i ". Wo tu`una si wawi ti`i kuêken nêra wo duduten. Ta`an si wewênê ya`ai dai` pê minalê`os wo dai` pira têmpo sia tu`una wo matêmo. Nu daked sê tou minangê merur, kuano ni mapênguma ya`ai " sa taintu, êndon no ai si sapi ti`i". Wo tu`una si sapi ti`i potongen nêra wo siniwo satê` ginaro wo dinouna`an.

Kasuatan ni`itu, êleken lako si bobot memato-mato witu ronga ung kendir, peduêduê`an wo sesindekano kan nu minêlek si ko`oko`, si wawi wo si sapi wayamo pinekepotong nêramo.

Karia wo katuari, sa na`an ni makitulung wia nikita setorona kita wo kumuan "Êina` .... dai` mapengapa ai wia niaku, ta`an nyana wo kêindo ku genang,". Genangeno wêta` sa si Empung timudu` mo um patuun : " A mbaya-waya un siwon-nu wia si esa`an angê wia sê katuari lengêy ya`ai , masuato kan itu siniwomu wuntud Niaku".

Sigi Duminggu