KAYU TEDU NA'AKA

KAYU TEDU NA'AKA
Senelêlê` um pinantik ni Roger Knapp

Pu`na rimaê na`an kinê nê kayu tedu makaloan. Ang kayu ya`ai timou aki tadun witu dudud ung kentur. Endo mekasa sêra metetudu`an un paipi-ipin wo um pakekapêyên nêra wia un toutouan nêra. Kuano ni kayu esa "Endo wia muri niaku pa`ad mamoali lemari aki walê ni kolano, pêndoon aku toro palê`osan am penapuden wangun: ung kau` wo un salaka, wo aku siwon nêra pekewangu-wangunen wo susud un endo sê tou mengêlengêlek niaku. Kuano ni kayu kadua "Sa niaku kouman pa`ad mamolai padewakan (kapal) ni kolano, pêndoon nyaku toro sakêan ni kolano wo ni ka`awuna wo sêra isêngkotku makadipud un tasik wia wawo un tana`. Waya nê sumakê wia niaku dai` maindê` nu ung kayuku têintu ngka ketêê, ni`itu wo aku ipalaya-laya` nê tou". Muri ni`itu kuano ni kayu katedu " Niaku pa`ad mawingkad wo tumou mamoali ung kayu sela wo rakêk u dai` kawalesan nê kayu wadina wia umbawo un tana`, wo niako toro pado-doo`en nê tou daked wo sa sêra mêlek am panga-ku sêra wo kumuan - akad-do mêna dangit am panga na`ai wo rêndê mo karia ni Empung ".
Dangkoyan laku un endo wo wengi, wo`o mo pira nata`un dimangkoy, endo mekasa na`an nê tou mepemanti` kayu mawiamo lako aki tadun nena`an nê kayu tedu ya`ai. Ka`e`êlek ni ma`êndo kayu esa ung kayu ketarê ti`i kuanamo " Wangun kouman ketêê ung kayo ya`ai, awes tarê ya êndonku wo iwangkêrku wia si masiwo lemari". Si kayu ketarê ya`ai têintu ung kalaya` unatêna, kuanamo " tantumo kouman siwon nêra aku mamoali lemari aki pa`urian ni kolano". Si tou si manakêilek si kayu kadua, kuanamo " Ung kayu ya`ai wangun danud wo ketêê, ni`iya toro iwangkêrku wia sê masiwo padewakan (kapal)". Si kayu kadua ya`ai têintu kasi`na ung kalaya` natêna, wo kuanamo " tantumo kouman aku siwon nêra mamoali padewakan ni kolano". Kawia`an lako ni ma`êndo kayu si kayu katedu ya`ai, nisia wo taindêean-no nu katudu`na mo sa sia wanti`en nêra um paipi-ipinan mamoali kayu rakêk wia um bawo un tana` dai`mo kalêlê`an. Kuano ni tou mawanti` kayu ti`i "Eiana` nikamu dua wayamo minakêilek ung kayu lê`os, sa têintu yo ung kayu mo ya`ai êndonku". Wo tu`una ung kayu ti`i winanti`na mo.
Mawia lako ung kayu katarê ti`i aki pasiwoan lemari, nisia dai` siniwo lemari ta`an siniwo uman kiok minamoali dontang papakanan sê reringaten wo nêi uman iwêê witu u logos. Ung kayu kadua ti`i mawia lako aki pasiwoan padewakan, dai` siniwo padewakan ta`an siniwo uman mamoali dondêy koki` pa`opasan sê pê`ên wia un tembir dawanan. Ung kayu katedu ti`i kouman tinaa` uman ni makapunya ni`itu wo nai uman iwaya` nêra witu ung karêndê umbalê. Ê kiok, minangakado angê um paipi-ipin nê kayu tedu ti`i.
Endo sumaduy endo, wengi sumaduy wengi, piramo nata`un dimangkoy, lakow-wo um paipi-ipin nê kayu tedu na`aka ya`ai wo kinadupa`an nêra mo. Endo mekasa, nena`an nê dua sena`awu minangê witu u logos iti`i nu nisêra dai siapa ento`an wadina. Wo si wewênê iti`i lumawid si undang wo sia ikolo` nêra witu u dontang ti`i. Si kayu katarê si siniwomo dontang ya`ai, tangkompo` wo ikatênga`ar nu nisia kinolo`an ni undang tudus si Rintê ni Opo Empung.
Pira nata`un dimangkoyo, na`an nê tou pira simake witu u dondêy ung kayu kadua woan wo siwon. Esa`an angê wia sê tou ti`i wendumo wo matekel witu. Dai` urê ni`itu sêra wo desungan un ewa`at, kuano ni kayu kadua ya`ai u reges ya`ai talouso entê` wo daimo karesenan-na, ta`an si tou si minatekel ti`i tumo`od wo tumela`ambak un ewa`at ti`i, kuanamo "Mekepens" wo tu`una un ewa`at ti`i tumedoo. Si kayu ya`ai tarê mawuda` sa si simakê wia nisia ya`ai siamo si Kolano nê kolano. Muri ni`itu, ung kayu katêdu u nai uman iwaya` iti`i, ni`itu nai ipaki pesa`an si tou esa makatutud u lalan puding nê tou daked. Si tou ya`ai siniasa wo giniogio nêra makatudud u lalan ti`i, nisia paka`awitan nêra, pianaduda`an, pinamêwê, pinawa`atat wo waya u dai` simana`asa pinakasiwo nêra mo wia si tou ya`ai kiok. Mawia lako aki toka esa, si tou ya`ai itimboi nêra witu ung kayu ti`i wo sia sensa`en nêra wo muri ni`itu sia wo sinuit nêra karia u wengkow. Witu angê un ari Duminggu, tarê ung kayu ya`ai mawuda` sa sia toro timo`od aki toka wo rimendê si Empung, nu si nai itimboi wia nisia, siamo Si Empung Yesus Kristus. Si timudus waya a ri`is nê tou wia wawo un tana`.
Karia wo katuari, Sêdang pê mayo un toutouan-Na minemas a ri`is nê tou piri`, Nisia pa`ad. Yo wo`o kan tarê tumadidi uman um paipi-ipin wo un pengalêyen nê tou. Setorona u mamoali wia un toutouan-ta ya`ai dai` senelêlê um kepepa`ad wo um paipiipin-ta, ta`an genagenangen no wêta` sa si Opo Empung kimaris-so u lalan kêndis wuntud nikita piri` sa kita wo ma`êman uman wia Nisia. Tanua sê kayu tedu na`aka ya`ai linêlê`an um paipi-ipin nêra ta`an dai` nai ilêlê` ung kepepa`ad nêra.
Sigi Duminggu wia sê karia wo katuari