LALAYA`AN RONDOR
Senelêlê um pinantik ni Marcella Kojongian witu um Facebook - Kawanua Sedunia.
Endo mekasa kinê na`an nê mapanguma sena`awu sê minangê ma`ayang depo, mekapa`ayang angê sêra tu`una suaten-no un udan. Kuano ni tuama iti`i wia si ka`awuna "O mamana, maimo tarê kita mesu`mo". Wo tu`na sêra mesu` wo makatudud u lalan mawuri nisêra dua makambêngan lako ma`an panguda-ngudanen. Dai` kampê urê sêra makêlang, dumangkoyo u motor esa sinakêan nê sena`awu. Wo kuano ni tuama mapanguma ti`i wia si ka`awuna :"êleken-nu lako sêra, talaya`mo sêra sê masakê motor ti`i, nu ma`an sêra inudanan ta`an, nisêra rewek man mawia lako aki walê nêra, dai` du`an nikita sê makêlang man wo urêpê tarê mawia lako mena um walê".
Kasuatan nê dua sena`awu sê masakê motor ti`i panguda-ngudanen wia lalan, na`an un oto pick-up dumangkoy wia nisêra. Kuano ni tuama masakê motor ti`i wia si ka`awuna " êina mamana, talaya`mo unatê nê masakê oto ti`i, nu nisêra dai madembes". Witu roro un oto pick-up ti`i, kasuatan nê sena`awu ti`i menarde-narndem dumangkoyo un oto mercy weru taintu ung kawangun. Kuano ni tuama masakê um pick-up ti`i wia si ka`awuna "êina mamana, ni`itu wêta` um pakuan oto, dai du`an un oto-ta ya`ai un tumoyo`an nai iyuntep mena bêngkêl. Talaya`mo un natê ni masakê u oto mercy ti`i". Si masakê mercy ti`i si tuama waidan esa, witu unoras nisia minêlêk sê dua un sena`awu sê makambêngan makatutud u lalan wo pinanguda-ngudan, kuano ni tuama waidan ti`i witu un natêna "talaya`mo unatê nê dua sena`awu ti`i, ma`an sêra panguda-ngudanen ta`an kênu sêra makambêngan lako marende-rendeman makêlang makatutud u lalan. ê kiok niaku ya`ai, niaku wo si ka`awuku urêmo dai` minaêlekan nu waya uman tasibu metetido` um pa`ayang".
Karia wo katuari, u lalaya`an rondor dai` kakapêyan sa nikita rangkêt uman madoo` wo mando`o-ndo`on uman u lalaya`an ka`apa un penapuden nê tou wadina. Ni`itumo rumagês uman wia si Opo` Empung witu umbaya-waya u nai itadidina wia un toutouan-ta, wo kita toro mêlek u Lalaya`an Rondor.
Sigi Duminggu karia wo katuari
No comments:
Post a Comment